🎓 2026 жылғы 25 қыркүйек пен 2 қазан аралығында С. Сейфуллин атындағы Қазақ агротехникалық зерттеу университетінің «Жануарлар ғылымы және ветеринария» институтында «Родина» агрофирмасы» ЖШС өкілдері — бас ветеринариялық дәрігер К.Ж. Туяков және мал сою цехының маманы Ж.Т. Нажиков біліктілікті арттыру курсынан өтті.

Курстың тақырыбы: «Мал сою цехында мал шаруашылығы өнімдеріне ветеринариялық-санитариялық сараптаманы ұйымдастыру және жүргізу».

Сабақтарды профессорлар Ю.А. Балджи, Ж.Ш. Әділбеков және қауымдастырылған профессор Р.Х. Мұстафина жүргізді. Теориялық дәрістер тыңдаушылардың жұмыс орнында, яғни «Родина» агрофирмасы» ЖШС-нің мал сою цехында өткізілген тәжірибелік сабақтармен толықтырылды.

🔬 Оқу барысында ветеринариялық-санитариялық бақылаудың негізгі кезеңдері қарастырылды: жануарларды қабылдау, тасымалдау және сою алдындағы күтіп-бағу талаптары, сою алдындағы ветеринариялық тексеру, сою технологиясы мен гигиенасын бақылау, ұшалар мен ішкі ағзаларға союдан кейінгі ветеринариялық-санитариялық сараптама жүргізу.

Патологиялық өзгерістер, инфекциялық және инвазиялық аурулар анықталған жағдайларда сойыс өнімдеріне санитариялық баға беру, сондай-ақ сынамалар алу, сараптама нәтижелерін құжаттау және ветеринариялық-санитариялық шешімдер қабылдау мәселелеріне ерекше назар аударылды.

🤝 Нақты өндірістік нысанда оқыту теориялық білімді ветеринария мамандарының күнделікті практикалық міндеттерімен ұштастыруға мүмкіндік береді. Университет пен шаруашылық арасындағы мұндай ынтымақтастық кәсіби құзыреттерді жетілдіруге және мал шаруашылығы өнімдерінің қауіпсіздігін бақылау сапасын арттыруға ықпал етеді.