2026 жылғы 21–23 қазан аралығында Ұлттық аграрлық ғылыми-білім беру орталығы (ҰАҒББО) С. Сейфуллин атындағы Қазақ агротехникалық зерттеу университетімен (ҚАТЗУ) бірлесіп, Астана қаласындағы EXPO халықаралық көрме орталығында өткен KazAgroFarm 2026 атты 17-ші Қазақстандық халықаралық агроөнеркәсіптік көрмеге қатысты.
Көрмеге әлемнің 25 елінен 350-ден астам компания қатысып, іс-шара агроөнеркәсіптік кешенге арналған заманауи технологияларды, ғылыми әзірлемелерді, жабдықтар мен инновациялық шешімдерді таныстыру алаңына айналды.
Көрме аясында «NFT-KATU» ЖШС өзінің ғылыми әзірлемелері мен зерттеу нәтижелерін, соның ішінде ауыл шаруашылығы жануарларына, құстар мен балықтарға арналған экструдталған құрама жемдерді, фитогендік азық қоспаларын, бал аралары ауруларының алдын алуға және оларды емдеуге арналған фитопрепараттарды, сондай-ақ мал шаруашылығында қолданылатын биопрепараттарды ұсынды. Сонымен қатар келушілер көпжылдық ғылыми-зерттеу жұмыстарының нәтижелерін көрсететін ғылыми жарияланымдармен, әдістемелік құралдармен және өнертабыстарға берілген патенттермен танысты. Ұсынылған әзірлемелер мемлекеттік органдар өкілдерінің, депутаттық корпус пен аграрлық сала мамандарының қызығушылығын тудырды.
Көрмеге Қазақстан Республикасының Ауыл шаруашылығы министрі Айдарбек Сейпілұлы Сапаров және Ауыл шаруашылығы вице-министрі Азат Сиражиддинұлы Сұлтанов келді. Шетелдік ресми қонақтардың қатарында Ливияның Ауыл шаруашылығы және мал шаруашылығы министрі Абдул Латиф Аль-Тахер, Иранның Ауыл шаруашылығы вице-министрі Голам Голмохаммади және Чехияның Ауыл шаруашылығы вице-министрі Ярослава Шпалкова болды.
Экспозицияға Қазақстан Республикасы Құрылтайының депутаттары, Аграрлық мәселелер, экология және табиғи ресурстар комитетінің мүшелері Мұрат Саматұлы Иргибаев, Замира Закиржанқызы Кузиева және Қайрат Қапарұлы Айтуғанов та келді. Депутаттық корпус өкілдері бал аралары мен ірі қара малға арналған биопрепараттарға ерекше қызығушылық танытты. Қонақтар ұсынылған әзірлемелермен, олардың мақсатымен және ауыл шаруашылығында іс жүзінде қолдану мүмкіндіктерімен танысты.
ҰАҒББО мен ҚАТЗУ-дың KazAgroFarm 2026 көрмесіне қатысуы отандық ғылыми зерттеулердің нәтижелерін кең кәсіби аудиторияға таныстыруға, агроөнеркәсіптік кешенге арналған ғылыми әзірлемелердің әлеуетін көрсетуге, сондай-ақ жаңа кәсіби байланыстар орнатып, одан әрі ынтымақтастық перспективаларын айқындауға мүмкіндік берді.
«NFT-KATU» ЖШС әзірлемелерін халықаралық алаңда таныстыру отандық биотехнологиялық шешімдерді ілгерілетуге және ғылым, өндіріс пен аграрлық бизнес арасындағы байланысты нығайтуға ықпал етеді.
